Os Bombeiros retiran tellas en perigo de caída dunha casa deshabitada en Estribela
Por Redacción
Efectivos dos Bombeiros de Pontevedra tiveron que acudir este venres, por segunda vez nunha semana, a retirar tellas soltas da cuberta dunha casa deshabitada de Estribela.
A intervención produciuse arredor das 20.00 horas deste venres nunha vivenda da praza Marqués de Valterra. Axentes da Policía Local de Pontevedra tiveron constancia da situación e solicitaron a intervención dos Bombeiros, a tempo que acordoaron o perímetro da vivenda para evitar posibles incidentes.
Segundo explicaron os Bombeiros, o tellado da vivenda está en mal estado de conservación e desprendéronse varias tellas, de modo que xeraba unha situación de perigo para os transeúntes. Para evitar calquera risco, servíronse dunha grúa, subiron ao tellado e retiraron todas as pezas que había soltas, máis de 40.
Hai tan só un semana tiñan tido que acudir á mesma vivenda por unha situación similar, de modo que a Policía Local de Pontevedra procederá agora a localizar os propietarios da vivenda para trasladarlles a situación e solicitar que se solucione.