350.000 euros investidos para restaurar a igrexa do Mosteiro de Armenteira
Por Redacción
Desde o 2009, a Consellería de Cultura investiu 350.000 euros na posta en valor da igrexa do Mosteiro de Armenteira, un espazo catalogado como Ben de Interese Cultural (BIC). Neles inclúese tanto a rehabilitación da igrexa como a reparación dun tramo do muro perimetral que pecha a finca do mosteiro, co que se procurou frear o deterioro da parte na que se apoia a fonte existente á entrada do adro no cenobio.
As actuacións desenvolvidas na igrexa corresponden á segunda fase da restauración do templo, tras a realizada entre os anos 1991 e 2006, e permitiron mellorar de forma considerable o aspecto exterior do templo, ao abeiro da colaboración establecida coa Deputación de Pontevedra e a Diócese.
Para iso realizáronse traballos de limpeza e restauración de fachadas, en especial a portada; de substitución e restauración das carpinterías, incluídos vidros de protección interior para o rosetón da fachada; e de reparación do pavimento interior. Ademais, acometeuse o soterramento de acometida eléctrica, construíuse unha rampla de acceso lateral para facilitar a accesibilidade ao templo, e drenouse o pavimento do adro para mellorar a súa conservación.
Na visita que realizou o conselleiro Jesús Vázquez, abordouse coa congregación do mosteiro a posibilidade de intervir en outros tramos do muro perimetral do mosteiro, no momento no que as dispoñibilidades orzamentarias o permitan. Se é posible, este mesmo ano, licitaríase unha primeira actuación, que podería alcanzar os 10.000 euros, para arranxar algún outro tramo pertencente á tapia do mosteiro que se seleccione pola súa gravidade ou pola necesidade perentoria de intervención.
O Mosteiro de Armenteira foi poboado por monxes de Claraval en 1164 e, segundo inscricións gravadas nos arcos, a súa igrexa data do 1181. O templo está conformado por tres naves e tres ábsidas semicirculares, con apilastrados, arcos apuntados e bóvedas de canón e de forno. A iluminación da igrexa procede das fiestras de tipo mudéxar, da lanterna de oito cascos sobre nervios paralelos e trompas cónicas que se atopa no cruceiro, e do rosetón de trazaría lobulada sinxela. A fachada complétase ademais cunha porta abucinada con arquivoltas de medio punto.
O claustro do mosteiro iniciouse no último cuarto do século XVI e rematouse un século mais tarde, mentres que a galería e a fachada datan de finais do século XVIII. A recuperación do conxunto do mosteiro iniciouse nos anos 60 do século XX por Carlos Valle-Inclán e os Amigos de Armenteira. A Xunta de Galicia, entre 1991 e 2006, levou a cabo dez intervencións de diferente alcance tanto na igrexa e nos edificios do claustro, como os seus espazos de acceso.