Lourizán homenaxea os seus maiores coa recuperación da romaxe coñecida como 'Festa dos Vellos'
Por Redacción
Lourizán rescatou con éxito unha das súas festas populares máis senlleiras. O campo da festa do Regueiriño, recentemente recuperado pola comunidade de montes da parroquia, acolleu a Festa dos Vellos. Facía preto de trinta anos que non se celebraba esta romaxe popular. Todo un evento lúdico e festivo para gozar en familia e que serviu ademais para facer unha homenaxe ás persoas máis maiores da zona.
Nesta ocasión, os homenaxeados foron José Santiago Pazos, de 95 anos, e Concepción Agulla Martínez, de 94 anos.
Os maiores da parroquia foron os protagonistas desta romaxe, pero tamén houbo actividades para rapaces e non tan rapaces, tratando de que fora toda unha celebración familiar e de confraternidade entre os veciños de Lourizán.
As actividades comezaron cunha visita pola ruta arqueolóxica dos Sete Camiños, para dar a coñecer aos interesados o patrimonio natural e cultural que agochan os montes do lugar. Trala actuación do grupo de gaiteiros Os Alegres, tivo lugar o recoñecemento aos máis vellos e unha churrascada popular que tivo un prezo simbólico de dous euros. Xa pola tarde houbo xogos tradicionais e como remate, a música do Trío Elegancia.
Ademais desta homenaxe, a festa pretendía dar a coñecer entre os veciños a recuperación deste espazo de esparexemento no Regueiriño. Fíxose unha inversión importante que só ten sentido, segundo a comunidade de montes, se este espazo é coñecido, usado e gozado polos habitantes de Lourizán. Entre as actuacións realizadas destaca a instalación dun miradoiro, desde o que contemplar as súas vistas panorámicas e únicas sobre a ría de Pontevedra.
Na organización desta romaxe popular colaboraron tamén a Comisión de Festas da parroquia de Lourizán e a Asociación de Veciños Estriceres.