Un menor recoñece que rompeu os retrovisores de varios coches na avenida de Lugo porque estaba enfadado
Por Redacción
A avenida de Lugo de Pontevedra apareceu a mediodía deste xoves cunha fila de vehículos cos retrovisores rotos. Rexistráronse danos nun total de seis coches e o seu presunto responsable logrou ser identificado, un veciño de Pontevedra menor de idade que recoñeceu que causou os danos froito dun enfado.
A Policía Nacional tivo constancia dos feitos sobre as 13.35 horas deste xoves 31 de xullo. Varios veciños chamaron á central da Comisaría alertando de que un mozo estaba a causar danos nos coches que estaban aparcados ao longo da avenida de Lugo.
Unha patrulla policial dirixiuse ao lugar e os veciños indicáronlle que o vándalo se dirixira cara ao barrio de Monte Porreiro, de modo que se estableceu un dispositivo de busca para intentar localizalo.
Sobre a base da descrición facilitada polas testemuñas, conseguiron localizalo e comprobaron que era menor de idade. O rapaz recoñeceulles que fora autor dos danos nos espellos retrovisores e xustificouse explicando que estaba enfadado. Rematou detido por un delito de danos.