Louro asegura que Pontevedra é a cidade máis prexudicada despois da última rectificación de Gallardón
Por Redacción
O alcalde accidental de Pontevedra, Antón Louro, asegura que a última rectificación do proxecto de Lei Orgánica do Poder Xudicial, que vén de anunciar o ministro Gallardón despois de reunirse co presidente galego, Alberto Núñez Feijoo, "converte a Pontevedra na vítima propiciatoria do novo mapa xudicial galego ". "A capital pontevedresa é a única das sete cidades galegas que perde gran parte do seu peso sen gañar nada a cambio", dixo.
Louro lamenta especialmente que un conselleiro pontevedrés, responsable en materia de xustiza, como é Alfonso Rueda, "se teña convertido en cómplice necesario para ter chegado a este nefasto resultado para os intereses xudiciais da cidade". Louro defende que o Concello de Pontevedra faga valer os intereses da cidade e exprese a súa protesta á Xunta de Galicia e ao Goberno de España.
Louro considera que o Partido Popular "vai ter moi difícil" de explicar o mantemento dos partidos xudiciais cando se eliminan, ao mesmo tempo, as Audiencias Provinciais, creando uns órganos "novos e etéreos" chamados Tribunais de Instancia cuxas funcións aparecen agora sen rango provincial, para o caso da provincia de Pontevedra, e máis difuminadas que nunca.
O resultado práctico da "enésima rectificación" de Gallardón é que Lugo e Ourense terán Tribunais de Instancia provinciais. A Coruña será sede única dun Tribunal Superior de Xustiza de Galicia moi reforzado, onde acabarán boa parte dos asuntos que agora resolven as audiencias. Santiago e Ferrol pasan a dispor de tribunais de instancia. E, finalmente, Pontevedra perderá a Audiencia Provincial e compartirá tribunal de instancia, sen rango provincial, con Vigo.