Ferida unha persoa na colisión de tres vehículos en Sanxenxo
Por Redacción
Polo menos catro persoas resultaron feridas este mércores noutros tantos accidentes de circulación rexistrados cunha hora e 20 minutos de diferenza en Sanxenxo, O Grove e Vilagarcía de Arousa. Aconteceu entre as 11.49 e as 13.11 horas.
Segundo informou o Centro de Atención de Emerxencias de Galicia 112, o primeiro dos accidentes produciuse en Sanxenxo ás 11.49 horas. Consistiu na colisión entre tres vehículos á altura do número 4 da avenida León e foi necesaria a asistencia sanitaria a unha persoa que resultou ferida. Ao lugar tamén acudiron a Policía Local, Emerxencias de Sanxenxo e o 061.
Un minuto máis tarde, ás 11.50 horas, o 112 tivo constancia doutro accidente en Sanxenxo a través da Policía Local. Unha persoa resultou atropelada na rúa Progreso e tivo que ser trasladada a un centro sanitario por efectivos de Urxencias Médicas de Galicia.
Ás 12.15 horas un particular alertou dun accidente no lugar da Xesteira, na parroquia de Sobradelo de Vilagarcía de Arousa. O sinistro consistiu nunha colisión frontal entre dous turismos e saldouse cunha persoa ferida que foi trasladada ao hospital por unha ambulancia de Protección Civil de Vilagarcía. Ao lugar acudiron tanto a Policia Local coma o Servizo Municipal de Emerxencias.
O cuarto incidente produciuse no Grove ás 13.11 horas e consistiu na colisión entre un coche e unha moto na estrada de San Vicente. Unha persoa tivo que ser trasladada por Urxencias Médicas de Galicia a un centro sanitario para recibir asistencia e ao lugar tamén se trasladaron a Policía Local, a Garda Civil de Tráfico e o Servizo Municipal de Emerxencias.