Pontevedra xa dispón dun Hospital de Día Pediátrico
Por Oskar Viéitez
Os nenos da comarca de Pontevedra estrenarán este xoves as novas instalacións do Hospital de Día Pediátrico do Complexo Hospitalario Universitario de Pontevedra.
Emprazado no andar de hospitalización de lactantes no Provincial, o novo Hospital de Día Pediátrico conta cuns espazos de 45 metros cadrados con capacidade para oito pacientes.
A súa dotación está composta por un facultativo coordinador, un profesional de enfermería e un técnico de coidados auxiliar de enfermería, ademais dos médicos responsables do seguimento do neno.
Inicialmente conta con 2 camas, 2 berces e 4 cadeiras de brazos, pero dita cifra pode adaptarse en función das necesidades asistenciais de cada momento, segundo as patoloxías e as idades dos pacientes pediátricos que requiran atención sanitaria.
As novas instalacións prestan atención ambulatoria á poboación da comarca de idades comprendidas entre os 0 e os 14 anos, tanto para procedementos de diversas especialidades, coma para intervencións de Cirurxía Maior Ambulatoria.
Estes pacientes reciben unha atención máis individualizada, polo que a súa ansiedade atenúase
"Trátase dun relevante pulo asistencial para a poboación infantil da comarca", segundo salientou a conselleira de Sanidade, Rocío Mosquera Álvarez, quen visitou o Hospital Provincial acompañada, entre outras autoridades, polo xerente de Xestión Integrada de Pontevedra e O Salnés, José Manuel González; polo delegado territorial da Xunta, José Manuel Cores Tourís; e pola xefa territorial de Sanidade, Ángeles Feijoo-Montenegro.
Co Hospital de Día Pediátrico conséguese unha maior comodidade e benestar para os pacientes pediátricos da comarca, xa que a súa actividade asistencial apenas altera ou interfire coa súa vida familiar, pois o mesmo día de efectuarlles o seu proceso médico ou cirúrxico, ditos pacientes poden volver ao seu ámbito cotiá e domiciliario.
Así mesmo, esta dinámica asistencial lles facilita unha recuperación máis rápida, nos aspectos somáticos e psicolóxicos. Estes pacientes reciben así, nas novas instalacións do Hospital de Día Pediátrico, unha atención máis individualizada, polo que a súa ansiedade atenúase. Tamén diminúen as complicacións que se puideran dar nun ingreso hospitalario.