Rueda destaca que o modelo de delegacións territoriais está plenamente consolidado pero aínda pode mellorar
Por Oskar Viéitez
O vicepresidente da Xunta, Alfonso Rueda, visitou a Delegación Territorial en Pontevedra para facer balance do seu traballo, cando se cumpren cinco anos da posta en marcha do novo modelo periférico da administración autonómica.
Nun encontro co delegado territorial da Xunta en Pontevedra, José Manuel Cores Tourís, e cos distintos xefes territoriais da delegación, Rueda explicou que un lustro despois, os datos avalan que "o sistema funciona" e o novo modelo está "plenamente consolidado, sen que se producise unha mingua no servizo que se presta os cidadáns".
No caso concreto de Pontevedra, aténdense arredor de medio millón de visitas cada ano e os tempos de tramitación dos expedientes reducíronse como media un 17 por cento respecto a hai cinco anos.
Rueda destacou a eficiencia do modelo cun mellor servizo aos cidadáns cun menor gasto do que tiñan antes. En concreto cifrou en preto de 10 millóns de euros de aforro conseguido na Delegación Territorial de Pontevedra, entre redución de altos cargos, coches oficiais, alugueres e o plan de aforro enerxético.
Os retos pasan agora por intentar algunhas melloras como "a disminución nos tempos de resposta e de tramitación", un terreo no que xogan un papel fundamental as novas tecnoloxías, porque "agora que a administración electrónica se está a impoñer cada vez máis, temos que reducir as veces que os cidadáns se teñen que achegar aquí fisicamente".
Ademais citou que se poden seguir obtendo aforros no parque móbil e modificacións na estruturas dos equipos para que non haxa ningunha duplicidade.
Finalmente o vicepresidente valorou como un "éxito" este modelo posto en marcha no arranque da pasada lexislatura cunha estrutura territorial que pasou de 52 a 5 altos cargos nas delegacións da Xunta, creando a figura dun único delegado territorial, na liña da austeridade e racionalidade administrativa imposta de xeito pioneiro polo Executivo autonómico " e que agora nos están a copiar noutras comunidades", concluíu.