Os ambulantes denuncian ante Facenda a invasión de vendedores ilegais de froita nas estradas
Por Oskar Viéitez
A Xunta eludiu a reclamación por "competencia desleal" dos vendedores ambulantes contra a proliferación de postos de venda ilegal de froita nas estradas.
A Dirección xeral de Comercio da Xunta de Galicia trasladou este martes á Fegamp a reclamación formulada pola Asociación Galega de Ambulantes e Autónomos (AGAA).
Os ambulantes esixían á administración autonómica que vixiase a "invasión" de vendedores ao pé das estradas que "ocultan a súa autorización municipal ou non dispoñen dela".
Ante a "pasividade" da Xunta, que se inhibe neste conflito, o colectivo de ambulantes diríxese agora á Fegamp, instando a que envíe unha circular a todos os concellos para que apliquen a normativa vixente en materia de venda ambulante "velando polo cumprimento das ordenanzas".
Paralelamente presentaron unha reclamación ante a Axencia Tributaria para que controle esta práctica de economía somerxida.
O presidente de AGAA, Francisco Romero Alvite, sinala a "irregularidade" desta práctica que "prexudica aos ambulantes que pagan relixiosamente os seus impostos".