Unha empresaria acepta cinco anos de prisión tras recoñecerse autora dunha estafa millonaria
Por Oskar Viéitez
A empresaria de Bueu, María Pilar Pérez Gesteiro, dona dunha correduría de seguros con sedes en Cangas e Marín, aceptou unha pena de cinco anos de prisión tras recoñecerse como autora dun delito continuado de estafa agravada por unha contía que supera o millón de euros.
A Sección Cuarta de la Audiencia Provincial de Pontevedra acolleu o martes o acordo de conformidade que evitou a celebración do xuízo.
O fiscal xefe, Juan Carlos Aladro, propuxo un acordo a esta muller que recoñeceu os feitos dos que se lle acusan a cambio dunha condena de só cinco anos de prisión, así como o pagamento dunha multa de 12 meses a 12 euros diarios e ademais que devolva as cantidades a uns 60 veciños do Morrazo afectados por esta fraude.
A Fiscalía entendeu que neste caso se deu un delito continuado de estafa agravada ou cualificada polo valor da defraudación ou polo abuso das relacións persoais ou polo aproveitamento da credibilidade empresarial ou profesional do defraudador.
Pilar Pérez utilizaba as achegas duns investidores para satisfacer os pagamentos dos rendementos aos outros
Esta veciña de Bueu, de 55 anos de idade, que chegou a ocupar cargos de dirección no PP de Bueu, rexentaba dúas axencias nas localidades de Cangas e Marín, onde captaba os clientes.
Segundo as denuncias dos afectados e as investigacións realizadas pola Unidade Orgánica da Policía Xudicial da Garda Civil de Pontevedra, dende o ano 2005 na denominada "Operación Embrujo", a procesada ofrecía aos seus clientes varios fondos de investimento, cunha rendibilidade do 10%, que documentaba, a maior parte das veces, con documentos falsos.
Nesta estafa piramidal Pilar Pérez utilizaba as achegas duns investidores para satisfacer os pagamentos dos rendementos aos outros.
Froito desta actividade ilegal incrementou notoriamente o seu patrimonio, constituíndo varias sociedades, adquirindo inmobles, vehículos e ata catro tendas de roupa e dous restaurantes nas localidades de Cangas, Marín e Pontevedra.
Pilar Pérez foi detida o día 20 de outubro de 2009, ingresando en prisión ata a data, polo que xa cumpriu a condena.
Os avogados dos estafados teñen poucas esperanzas en que lles devolvan o diñeiro aos seus clientes.