A Alternativa Socialista cualifica de "auténtico golpe de Estado" o cambio de baremo para o congreso provincial
Por Oskar Viéitez
Os membros da candidatura que se opuxo a actual dirección provincial de Pontevedra cualifican de "auténtico golpe de Estado" o cambio de representatividade para o congreso provincial do próximo día 19 de xullo.
Xa no congreso provincial do 2012 este mesmo colectivo representado por José Manuel Valcárcel, Marta Giráldez, Ana Doval ou Carmen Cajide, entre outros, denunciou "a intención da Executiva Provincial de modificar o baremo para dar un xiro radical ao sistema de representación do PSOE, conseguindo frear a súa intención nun Comité Provincial".
Nun comunicado remitido aos medios Alternativa Socialista afirma que "conseguimos liderar o proceso de avance na participación da militancia cos primarias consultivas galegas e queremos defender o proceso de integración global das pequenas e medianas agrupacións nos procesos congresuales".
O intervalo habitual de representatividade no PSdeG oscila entre un delegado por cada 30 e 45 militantes (o resto das provincias acaban de optar por 35). Segundo denuncian, a Executiva Provincial de Pontevedra rebaixa o baremo a 1 por cada 15 militantes, o que dispara a representatividade das grandes agrupacións.
Como exemplo sinalan que, cos datos de afiliación do 2012, a Agrupación de Vigo pasa de ter un 21,7% de peso no Congreso a ter un 28%. A suma de tres (Vigo, Vilagarcía e Pontevedra) das 60 agrupacións da provincia sumaba un 32% pasando agora a controlar, por si soas, o 50%.
Alternativa Socialista afirma que este "cambio tan drástico ten lugar sen convocar un Comité Provincial para o o seu debate. Falamos, pois, dun auténtico pucherazo e esiximos corrección inmediata".