As sardiñas máis frescas a 8 euros o quilo
Por Oskar Viéitez
As sardiñas máis frescas, as do xeito, chegaron este luns ás bancadas dos mercados de abastos de Pontevedra, Portonovo e Marín.
A Consellería de Medio Rural e de Mar permitiu á frota do cerco saír a faenar este domingo ante a festividade de San Xoán.
Os que esperaron a última hora para comprar este manxar obtiveron a súa recompensa ao poder comprar o produto máis fresco a un prezo moderado. Máis baratas mesmo que o venres.
Esta mañá de luns a sardiña vendíase a 8 euros o quilo, fronte aos doce que chegou a alcanzar a pasada semana.
Da súa experiencia doutros anos as pescantinas aseguran que "a clientela sempre deixa as compras para o final e este ano máis que nunca, porque a xente está pendente da chuvia".
Outra circunstancia que inflúe na contención dos prezos desta véspera de San Xoan foi a gran cantidade de produto que se ofrece. Moitas eran as dúbidas en días anteriores sobre se habería ou non sardiña, finalmente a marea foi boa e os mariñeiros deron con suficientes bancos de sardiña como para satisfacer a demanda, contendo os prezos. De aí tamén que fosen máis caras o venres, ante a incerteza pola escaseza.