Retiran case 4.000 quilos de residuos do peirao cambadés de Tragove
Por Redacción
Portos de Galicia e o centro de mergullo Palmira Scuba da Pobra do Caramiñal retiraron nos últimos días preto de 4.000 quilos de residuos no peirao de Tragove, en Cambados.
Os residuos sólidos foron retirados do fondo mariño do peirao. Entre os obxectos encontrados destacan algúns de gran dimensión, como colectores metálicos, rodas ou sinais botados ao mar.
Ademais tamén se sacaron da auga materiais e restos da propia actividade portuaria que rematan no fondo mariño por accidente, como caixas de peixe ou cabos desprendidos das embarcacións.
Esta actuación enmárcase dentro dun plan do ente público destinado a garantir a seguridade e o bo estado ambiental das instalacións portuarias.
ADXUDICADAS AS OBRAS DE SANEAMENTO DO SACO DE FEFIÿÁNS
Noutra orde de cousas a Consellería de Medio Ambiente acaba de adxudicar á empresa Petrolama Veiga S.L. a primeira fase das obras para emendar as verteduras no Saco de Fefiñáns.
Os traballos, presupostados en 82.451,74 euros consistirán en afrontar o saneamento da Rúa do Pombal, cuxo sistema de rede de sumidoiros verte directamente sen tratamento sobre un regato que chega ao Saco de Fefiñáns.
Nas obras procederase a cambiar 120 metros de colectores e a instalar unha pequena estación de bombeo que impulse as augas residuais das vivendas ata a rede de saneamento existente.
O plan de Saneamento Integral do Saco de Fefiñáns terá unha segunda fase de actuación máis ambiciosa que elevará a dotación presupostaria a máis dun millón de euros.