"Caca, culo, please"
Por Oskar Viéitez
O Concello de Vilagarcía pretende eliminar a presenza de excrementos caninos nos espazos públicos da cidade, mediante unha campaña que incide na información e concienciación, e por riba de todo, as sancións de ata 300 euros para os incívicos donos dos cans.
O alcalde popular, Tomás Fole, compareceu en compañía dos seus concelleiros de Medio Ambiente, Jesús Longa, e Seguridade Cidadá, Cholo Dorgambide, para presentar esta campaña que arranca coa repartición de carteis e dez mil trípticos co lema "Caca, culo, please". Ademais instalaranse máis papeleiras.
Pero o aspecto máis controvertido é que policías locais de paisano vixiarán algúns enclaves da cidade para pillar infraganti quen non recolla as feces do seu can.
O goberno local considera este aspecto fundamental para que a medida teña éxito, a Policía Local realizará patrullas de paisano, xa que os infractores soen evitar que o can defeque, ou recollen as feces cando ven a un axente uniformado preto.
Dorgambide tamén apuntou á posibilidade que os propios cidadáns denuncien aos infractores, para o cal só fan falta dúas testemuñas que acrediten a comisión da infracción e que chamen de inmediato á Policía Local, a Protección civil ou ao 112 para requirir a presenza das autoridades.