O alcalde de Cotobade súmase ao 'Legado do Tibu' bañándose no Lérez
Por Redacción
"Son o soldado Cubela ", así diríxese o alcalde de Cotobade aos seus amigos de Facebook no vídeo que gravou nas últimas horas participando no Legado do Tibu, o fenómeno viral que obriga a gravarse bañándose en auga fría para evitar pagar unha mariscada.
Jorge Cubela, que autorizou a súa difusión, protagoniza un longo, divertido e elaborado vídeo con banda sonora da serie Os vixilantes da praia e títulos de crédito, malia que de escasa calidade visual. Con lentes acuáticos e gorro de ducha, o alcalde máis novo de España xustifica a súa acción, entre risas, "na faena que nos están facendo de ir a auga conxelada, porque a min non me vale os que van ás duchas ou ás bañeiras".
Cubela rende un tributo a aquelas persoas que seguen con esta moda noutros países e alega que se trata dun formato orixinal solidario de axuda aos demais, igual que na película Cadea de favores. Neste sentido, o rexedor solicita apoio a Álex, un neno que precisa dunha operación e reclama aos espectadores que concedan un 'Gústame' no facebook solidario con esta causa "Axúdanos a camiñar".
Despois, Cubela cita os seus tres nominados, entre os que se encontra o presidente de Novas Xeracións do PP de Pontevedra, Arturo Casal, que terán que realizar unha acción similar antes de 48 horas ou pagarán unha mariscada. Antes de lanzarse ás frías augas do Lérez, o alcalde conxúrase "aos profestas e aos espíritos da Santa Compaña".
Tras o breve baño, Jorge Cubela en albornoz comenta ante a pantalla do móbil: "foi unha boa experiencia. Moitas grazas e vémonos en Cotobade".