Ponte Caldelas adecenta as árbores do seu casco urbano de cara as súas festas de verán
Por Redacción
Ponte Caldelas está mellorando a súa imaxe urbana a través de labores de poda e ornamentación nas distintas árbores que adornan o seu casco urbano. Persoal experto en materia forestal está eliminando estes días as ramas danadas ou que sobrecargan a especies como as camelias e palmeiras presentes nas principais rúas e prazas do municipio.
Os restos da poda son recollidos por operarios especializados co fin de ser tratados e aproveitados como biomasa.
Os operarios realizaron labores de poda nas camelias situados na rúa da Ponte, nas súas interseccións coa Avenida de Vigo e a rúa Augusto González Besada, mentres que tamén foron obxecto dos seus traballos as palmeiras situadas na Praza de España e as inmediacións do tanatorio e o campo municipal de fútbol en Chan da Barcia.
Estes traballos iniciáronse días antes da celebración da Festa da Troita e agora culminaranse pequenos detalles que contribúan a deixar perfilada a nova imaxe do centro urbano de Ponte Caldelas para as celebracións estivais da Festa da Batalla e dos Dolores.