Podemos Poio inicia o seu proceso constituínte coa vista posta nas eleccións municipais
Por Oskar Viéitez
Podemos celebrará unha asemblea constituínte da súa agrupación local no municipio de Poio o próximo luns ás 20.00 horas na Cafetaría Anfield, en Porteliña.
As caras visibles desta formación anunciaron a convocatoria, recalcando que se trata dunha cita aberta a toda cidadanía.
Jacobo García, Roni Burgos, Jaime Vilas e Ambar Burgos son algunhas das persoas que compoñen Podemos Poio que aspira a formar unha candidatura sólida coa que concorrer ás eleccións municipais de maio de 2015.
Segundo informou Jacobo García, tras a constitución da agrupación de Poio, iniciarase un proceso de toma de contacto con diferentes colectivos para coñecer os seus problemase ir tomando un posicionamento. "Queremos estar ao lado da xente para buscar solucións aos seus problemas", afirmou, "o marisqueo, as comunidades de montes, as asociacións de veciños, etc".
Ao longo dos próximos meses irán recollendo as inquietudes dos diferentes axentes sociais do concello e á súa vez trasladarán o ideario de Podemos. Cando se acheguen os comicios municipais iniciarase un proceso de primarias para elixir aos integrantes dunha candidatura ao goberno local.