A Xunta certifica que os alumnos do Froebel están seguros
Por Oskar Viéitez
A delegada territorial da Xunta en funcións en Pontevedra, Ana Ortiz, visitou o avance das obras de reforma do CEIP Froebel na cidade do Lérez para coñecer, de primeira man, o desenvolvemento das mesmas e o procedemento de seguridade aplicado durante a execución dos traballos.
Os nenos e os profesores poden realizar a súas tarefas habituais con total seguridade
"Para nós é esencial garantir que os nenos e os profesores poden realizar a súas tarefas habituais con total seguridade", asegurou Ana Ortiz.
Durante a visita, a delegada estivo acompañada do xefe territorial de Cultura e Educación, César Pérez Ares, así como de técnicos deste departamento e responsables da empresa adxudicataria da obra.
"Estase a traballar nas áreas non lectivas como o comedor, a biblioteca ou a zona para o profesorado, polo que os pais poden estar tranquilos de que os alumnos están a desenvolver con total normalidade o seu día a día no centro", afirmou o xefe territorial de Educación "ademais, está garantida totalmente a seguridade dos mesmos cun control diario por parte dos técnicos da Xefatura Territorial".
Control diario por parte dos técnicos da Xefatura Territorial
Esta primeira fase da obra, que supón un investimento de 520.000 euros, permitirá mellorar a accesibilidade ao centro e reformar varios espazos do mesmo.
Nestes intres estase a executar o oco para a instalación do futuro ascensor que conectará as tres plantas do centro, así como habilitándose a futura biblioteca e varios accesos. Segundo apuntan os técnicos, a obra avanza segundo os prazos, "polo que esperamos que poida estar rematada a finais de febreiro ou principios de marzo", engadiu, pola súa banda, César Pérez Ares.
O xefe territorial e a delegada en funcións agradeceron, especialmente, a comunidade educativa "a súa paciencia, xa que somos coñecedores de que as obras poden supoñer algunha molestia para o centro, os profesores e os alumnos".
En concreto, nesta fase, estanse a realizar obras relativas á parte da edificación correspondente a entrada dende a rúa Alfonso XIII que abarca a fachada desa rúa e o patio triangular que se incorpora á edificación. Tamén se están a reparar os acabados e o sistema de recollida de augas nas cubertas e se construirá unha nova no patio coa incorporación duns lucernarios que permitan o paso da luz.
"Esperamos que poida estar rematada a finais de febreiro ou principios de marzo"
Tamén se demolerá a fachada que da ao patio e substituiranse a iluminación e electricidade das aulas de primaria e de desdobre e o pavimento das aulas.
Reformarase integralmente a torre de Alfonso XIII coa substitución dos forxados, a colocación dun falso teito e a instalación de iluminación e se construirá un vestíbulo na biblioteca, se reformará a carpintería das ventás e das portas e se instalará o falso teito da biblioteca e da sala de profesores. Ademais, instalarase unha rampla de acceso ao comedor.