Sanxenxo agarda xuntar 1.000 nenos na XXI Carreira Escolar do Salnés
Por Redacción
A Carreira Escolar do Salnés, un evento a medio camiño entre o deporte, a educación e a reivindicación social, chega este ano a súa vixésimo primeira edición. Desta volta celebrarase polas rúas de Portonovo o vindeiro venres 30 de maio, a partir das once da maña. Participarán colexios de Sanxenxo, Vilanova de Arousa, Ribadumia, Meis, Vilagarcía de Arousa, Meaño e Soutomaior.
"Pretendemos que sexa un día festivo e de convivencia ao redor do deporte e da cultura galega e como máximo expoñente diso, o noso idioma", sinalou Felipe Martín, coordinador deportivo da proba, quen asegurou que agardan tamén fomentar un xeito de vida saúdable dunha forma divertida "como non pode ser doutra maneira con rapaces destas idades".
Co paso dos anos, esta carreira estase a converter nunha clásica do deporte da comarca do Salnés. Centos de rapaces xúntanse cada ano, para correr polas rúas da vila, no que quere ser, ademais dunha proba deportiva, unha manifestación dos nenos en pro do atletismo, e como canle de achegamento e comunicación.
Ademais, busca sensibilizar ás autoridades para que doten ao concello dunhas instalacións de atletismo dignas.
Os seus organizadores aseguran que non queren esquecer o carácter cultural da mesma e a reivindicación para usar a lingua galega. Así, este ano baixo o lema "En galego gañamos tod@s", pretenden superar os 1.000 participantes.
A proba discorrerá por un circuíto pechado totalmente ao tráfico rodado, co que a seguridade está garantida durante o desenrolo da proba. Todos os nenos que participen na carreira terán ademais á súa disposición todo tipo de facilidades para seren transportados en autobús desde os respectivos centros educativos.
Os nenos de categoría prebenxamín e benxamín farán un percorrido de 1.200 metros; alevín e infantil feminino, de 2.700 metros; e infantil masculino, cadete e afeccionados, de 3.900 metros. Haberá trofeos para tres primeiros de cada categoría e trofeo para os 30 primeiros rapaces en completar cada unha das probas.
A inscrición pode realizarse na web www.colexioabrente.com ou a través dos formularios que teñen os centros educativos da comarca.