Vilagarcía pide colaboración cidadá para localizar os vándalos do parque Miguel Hernández
Por Redacción
O concelleiro de Parques e Xardíns de Vilagarcía, Jesús Longa, solicita a colaboración dos veciños para que avisen á Policía se ven actuar aos vándalos que nos últimos tempos causaron distintos danos no parque Miguel Hernández ou que proporcionen información que axude a identificalos.
O Concello advirte que se intensificará a vixilancia e anuncia que denunciará ante as autoridades xudiciais ás persoas responsables de destrozos no mobiliario urbano e nos bens públicos municipais despois de que esta fin de semana se volveran a rexistrar novos danos nas instalacións do Miguel Hernández.
Despois da xornada de Santa Rita, na que o mesmo día da apertura do novo parque infantil do Miguel Hernández foron arrancados dous elementos decorativos do castelo, esta fin de semana volveron rexistrarse danos tanto na zona infantil como no mobiliario da zona de esparexemento.
En concreto, apareceron rotas ou arrancadas dende a base a maioría das papeleiras de inox do parque ao igual que unha fonte de premedor. E na zona de xogos dos nenos, os vándalos romperon varios elementos da estrutura (as agullas dun reloxo, un adorno en forma de seta e dous paxaros) e tumbaron un balancín.
Jesús Longa tamén fai un chamamento aos veciños para que colaboren no coidado dos bens públicos e para que denuncien a aqueles que non os respectan xa que "este tipo de accións incívicas e vandálicas, ao final, pagámolas todos".