'Podemos' irrompe nas eleccións europeas como a cuarta forza máis votada na provincia
Por Redacción
Creada e actualizada
Creada e actualizada
O Partido Popular foi a forza política con máis votos nas eleccións europeas na provincia de Pontevedra, segundo os datos ofrecidos polo Ministerio do Interior cun escrutinio do 99,51%, ao obter 113.038 votos, que supón unha porcentaxe do 32,35%, pero perde 71.336 respecto ás eleccións europeas de hai cinco anos cando tamén foi a agrupación máis votada cun 48,77%.
O Partido Socialista sitúase de novo como segunda opción con 73.820 papeletas e unha porcentaxe de voto do 21,12% e perde tamén outro importante número de votos, 60.936. No 2009 alcanzaran un 35,65% dos votos na provincia de Pontevedra.
En relación cos resultados dos anteriores comicios europeos no ano 2009, o BNG deixa de ser a terceira forza con máis sufraxios, posición que pasa a ocupar AGE con 40.005 votos (11,44%) seguido pola agrupación política que lidera Pablo Iglesias, 'Podemos', que se converteu no cuarto partido con máis apoio electoral ao obter na provincia 32.884 votos (9,41%). No seu caso, sobre todo, polo seu bo resultado en Vigo, onde logrou case 14.000 votos.
O BNG sitúase en quinto lugar con 31.223 votos (8,93%), 5.064 papeletas menos que nas eleccións europeas de hai cinco anos.
Por último, UPyD obtivo 12.584 papeletas, cunha porcentaxe de voto que se sitúa no 3,60%.
A participación sitúase no 46,36%, superior ao 43,38% das eleccións de 2009, coa participación de 358.548 electores e unha abstención de 414.819 persoas con dereito a voto na provincia. Rexistráronse 10.018 votos nulos e 9.537 en branco.
Cos resultados destas eleccións, o único europarlamentario pontevedrés que se sentará en Bruxelas os próximos cinco anos será Francisco Millán Mon, número 8 da lista do PP ao Parlamento Europeo. Xunto a el estarán, en principio, outros dous representantes galegos. Trátase de José Blanco, número 10 da candidatura do PSOE e Lidia Senra, de Anova, que ocupaba o posto número 5 na lista de La Izquierda Plural.
DATOS LOCAIS
No caso do concello de Pontevedra, o Partido Popular volveu ser a forza máis votada nunhas eleccións europeas. Logrou con 8.563 votos (27,78%), pero reflicte un notable desgaste. En 2009, obtivo o respaldo de 13.603 electores (44,27%). ÿ dicir, cinco mil votos e 17 puntos menos que hai cinco anos. Igual que o PSOE, que se mantén como segunda forza con 6.470 votos (20,99%), fronte aos 11.576 votos (37,67%) de 2009.
O BNG, que sufriu un forte retroceso nas grandes cidades, mantén Pontevedra como un dos seus principais feudos. Son terceira opción con 3.590 votos (11,65%), mellorando os seus resultados de hai cinco anos, cando lograron 3.144 votos (10,23%). Preto dos nacionalistas quedan AGE e Podemos, cuarta e quinta forza, con 3.235 votos (10,49%) e 3.161 votos (10,25%), respectivamente.
Con respecto ao resto dos municipios da provincia de Pontevedra, o Partido Popular gaña en 60 dos 62 concellos. Tan só é superado polo PSOE en dous dos seus feudos tradicionais, A Illa de Arousa e Fornelos de Montes.