O PSOE de Marín instará ao Concello a recorrer a sentenza que confirma que parte do Porto pertence a Pontevedra
Por Oskar Viéitez & Mónica Patxot
O ex alcalde de Marín e voceiro do grupo municipal do PSdeG, Francisco Veiga, anunciou que instará ao Concello a que recorra a sentenza da sección segunda da Sala do Contencioso-Administrativo do Tribunal Superior de Xustiza de Galicia (TSXG) que avala que unha parte do Porto pertence a Pontevedra.
Un recente fallo do alto tribunal galego desestima o recurso que presentou en 2011 o concello de Marín, sendo alcalde Francisco Veiga, para que o rexedor capitalino, Miguel Anxo Fernández Lores, deixase de formar parte do consello da Autoridade Portuaria ao entender que toda a zona de servizo do peirao, incluindo os terreos gañados ao mar, é propiedade marinense.
Aquel recurso contencioso-administrativo agora desestimado foi aprobado de xeito unánime por toda a corporación de Marín.
O deslinde definitivo do Porto aínda non se resolveu
"Creo que tenemos argumentos de sobra para poder defender nuestra posición y justificar la demanda que impulsamos en su momento de que el ayuntamiento de Marín contase con las dos vocalías municipales en el consejo ya que entendemos que el Puerto es de Marín y así debe estar reconocido", insistiu Veiga.
A sentenza do TSXG recorda que o deslinde definitivo do Porto aínda non se resolveu, pero dá por boas as probas documentais achegadas por Pontevedra neste proceso e afirma que "o espazo terrestre da zona de servizo do porto afecta aos termos municipais de Marín e Pontevedra".