O alcalde acusa a Enrique Vaqueiro de crear un "falso" clima de inseguridade cidadá na Lama
Por Redacción
O alcalde da Lama, Jorge Canda, acusa o voceiro local do PSdeG-PSOE, Enrique Vaqueiro, de ser o "principal responsable" de ter creado un "falso" clima de inseguridade cidadá no muncipio, pois coas súas denuncias sobre a vaga de roubos dos últimos meses pon en dúbida do traballo das Forzas de Seguridade do Estado e a tranquilidade e a convivencia veciñal.
Recrimínalle, ademais, que insistise, a través das redes sociais, na existencia de numerosas casas de emigrantes baleiras durante longos períodos de tempo e insinúa que puido ser, nalgún caso, e de xeito "irresponsable", "indirecto", e "seguro que involuntariamente" responsable dunha especie de efecto chamada que levantou, "sen querer", a atención sobre estas casas.
Fronte a ese clima de inseguridade, o alcalde asegura que A Lama se caracteriza por ser un dos municipios máis seguros da provincia e para aseguralo, bota man das estatísticas que ten a Subdelegación do Goberno, pois en 2013 o número de delitos na Lama descendeu un 30,77% e as faltas cometidas por veciños deste municipio un 25,93%. En total produciuse un descenso medio dun 28,30% nas cifras de delincuencia.
Ademais, indica que en 2014 a Garda Civil esclareceu un 66,67% máis de delitos que o ano pasado na Lama e que dende que se detectou un "repunte puntual" no número de roubos en casas o alcalde se puxo en contacto coa Subdelegación do Goberno e se despregaron máis unidades da Garda Civil. Tamén se intensificaron os controis por estradas, a identificación de vehículos e condutores e puxéronse en marcha accións de concienciación cidadá a través de Plan Maior Seguridade no Rural.
En cifras, Canda sinala que ata o 2 de maio de 2014 se denunciaran ante a Garda Civil un total de 14 roubos. Malia ser unha "cifra importante" que motivou a adopción de medidas de reforzo da seguridade, o número está "moi lonxe" dos 35 ou 40 roubos dos que fala o voceiro socialista. Na súa opinión, esas cifras ten a "clara intención política de provocar un estado de inseguridade colectiva" e asustar a persoas maiores que viven soas nas súas casas.
Relacionadas:
-
Expulsan de España os romaneses condenados por roubar en casas da Lama
Por Oskar Viéitez |
-
O PSOE e o alcalde da Lama condenan as pintadas ameazantes na casa do concelleiro Enrique Vaqueiro
Por Redacción | Creada e actualizada
-
Veciños de Xesta (A Lama) piden a expulsión do país dos detidos como sospeitosos da vaga de roubos
Por Redacción | Creada e actualizada
-
Dous novos roubos en casas deshabitadas manteñen a alerta social na Lama
Por Natalia Puga |
-
A Garda Civil cifra en 22 os roubos rexistrados na Lama
Por Redacción |
-
O Subdelegado reduce a 14 o número de roubos na Lama no que vai de ano
Por Oskar Viéitez |
-
O PSOE pide a dimisión do subdelegado do Goberno polo seu "desleixo" ante a vaga de roubos na Lama
Por Redacción |
-
A Garda Civil aconsella os veciños da Lama ante a vaga de roubos
Por Redacción |