Satisfacción polo avance das obras de mellora do abastecemento de auga a Pontevedra e a súa Ría
Por Oskar Viéitez
Na reunión celebrada este mércores no Concello de Pontevedra os responsables da sociedade estatal Aguas de las Cuencas de España (Acuaes) e dos concellos de Pontevedra, Sanxenxo, Poio, Vilaboa e Marín valoraron con satisfacción o avance das obras de mellora do abastecemento de auga a Pontevedra e a súa ría.
Esta actuación requirirá un investimento total de 39,9 millóns de euros.
OBRAS NA MARXE DEREITA
As obras da marxe dereita iniciáronse no mes de abril do pasado ano.
No Concello de Pontevedra trabállase na mellora da estación de bombeo en Monte Porreiro, así como na construción da nova condución de abastecemento á ETAP de Pontevedra dende o encoro do Pontillón, onde se colocaron xa 4.500 metros de condución.
Ademais, xa se instalaron 2.800 metros de canalización da nova condución que vai dende a ETAP ao bombeo de Monteporreiro, e dende esta zona ao depósito de Mourente. Nesta zona finalizaron os labores de movemento de terras necesarias para a ampliación da ETAP e o depósito de Lérez, e deu comezo a fase de obra civil coa execución da lousa do novo depósito.
Así mesmo, comezaron as obras de execución do depósito de Mourente, que se encontra en fase de formigonado dos muros laterais.
No Concello de Poio estase a traballar na renovación das arterias de abastecemento a Poio e a Sanxenxo, situadas baixo a estrada PO-308. Neste tallo xa executáronse e probado con éxito os 12 quilómetros de conducións proxectados, na súa maioría aplicando tecnoloxías sen gabia. Actualmente estanse a levar a cabo os traballos de reposición do aglomerado na estrada PO-308, cuxo firme se viu afectado pola execución desta condución. Unha vez finalizada a reposición da citada estrada, continuarase coas tarefas de reparación dos viais e estradas afectadas dentro do termo municipal de Pontevedra.
Por último, en Sanxenxo completouse a obra dos depósitos de Dorrón e Buezas. Do mesmo modo, tamén concluíron as obras da condución proxectada entre os depósitos de Padriñán e Buezas, de 1.200 metros de lonxitude.
OBRAS NA MARXE ESQUERDA
As obras na marxe esquerda, que foron adxudicadas o pasado mes de abril, desenvolverán o tramo incluído entre os concellos de Pontevedra e Vilaboa, e consisten na construción dunha condución que, partindo do depósito de regulación que se executará en Mourente, percorrerá o arco da marxe esquerda da ría, bordeando pola zona sur o Concello de Pontevedra ata Lourizán.
O proxecto inclúe tamén a execución dun ramal para o abastecemento de Vilaboa, no que se executarán dous depósitos reguladores cunha capacidade de almacenamento de 1.750 m3 cada un, que garantirán a subministración das puntas de demanda deste Concello.
Ademais, executaranse un total de 17 quilómetros de conducións, de fundición dúctil, de nova implantación, con diámetros que oscilan entre os 250 e os 600 mm.
Por outra parte, xa finalizou a redacción do proxecto das obras correspondentes ao Concello de Marín. O novo trazado foi presentado en abril ao Concello e aos veciños das parroquias afectadas. En setembro sairían a licitación e as obras empezarán en xaneiro de 2015.
A finalización das obras de abastecemento de auga a Pontevedra e a súa ría supoñerán unha mellora da cantidade e calidade da auga que chega á poboación das localidades beneficiadas e levará consigo un importante aforro enerxético, evitando o risco de desabastecemento polas puntas de demanda debidas ao incremento de poboación dos núcleos turísticos.