Operación 'bacheo' en Ponte Caldelas
Por Redacción
Chega a operación 'bacheo' a Ponte Caldelas. Operarios municipais están a proceder á reparación das distintas vías de comunicación interior utilizadas para vertebrar a dispersa rede de núcleos de poboación que compoñen este concello.
Segundo informa o Concello, o operativo consiste en tapar as fochas dos viais afectados que foron aparecendo, a maioría, pola acción das pasadas inclemencias meteorolóxicas. Aproveitando a mellora das condicións meteorolóxicas, están a proceder a resolver e poñer en perfectas condicións o firme afectado destes viais.
Para a realización destes traballos, organizaron unha brigada de conservación e reparación composta por tres operarios e un camión municipal. Con esta brigada preténdense reparar algunhas fochas puntuais existentes en distintos camiños.
Ademais, o alcalde, Perfecto Rodríguez, xestionou ante a Deputación de Pontevedra a adquisición dun camión que en breve axudará a resolver os problemas que presenta o firme de varios viais de titularidade municipal. Con este camión poderase facer unha actuación máis completa para reparar viais de máis lonxitude.