O Fondo Social Europeo e a Xunta dispoñen de 3,4 millóns de euros para promoción da Igualdade en Pontevedra
Por Redacción
A secretaria xeral de Igualdade, Susana López Abella presentou este martes aos representantes dos concellos da demarcación territorial de Pontevedra a convocatoria de axudas e subvencións ás entidades locais para a promoción da igualdade. O seu orzamento é de 3,4 millóns de euros, cofinanciados ao 80 por cento polo Fondo Social Europeo.
Susana López Abella acompañada da secretaria territorial da Delegación da Xunta en Pontevedra, Ana Ortiz, e do subdirector de Promoción da Igualdade, Ramón Quiroga Limia, enmarcaron estas achegas dentro do reforzo do Goberno galego na promoción da igualdade nos concellos coa concesión nesta convocatoria de anticipos de ata o 80 por cento da subvención concedida.
A iniciativa pretende contribuir a que as entidades locais dispoñan dos recursos cando realmente o precisan, para destinar, por unha banda, á elaboración e avaliación de plans de igualdade, accións de capacitación do persoal municipal ou a realización de actividades de coeducación dirixidas á poboación infantil e xuvenil. Ademais, tamén se destinarán a accións de prevención e tratamento integral da violencia de xénero.
A contía máxima que pode recibir unha entidade local nesta liña de axudas é de 10.000 euros, de 12.000 para o programa destinado ao fomento da conciliación e de 45.000 euros, para o programa dedicado aos Centros de Información a Muller.
Segundo destacou a secretaria xeral da Igualdade, as bases reguladoras seguen a priorizar, ao igual que o ano pasado, as solicitudes presentadas conxuntamente por varios entes locais.