Manteñen a petición de catro anos de prisión para un veciño de Carril por intentar violar a súa filla
Por Natalia Puga
A Fiscalía mantén a petición de catro anos de prisión para un veciño de Carril, en Vilagaría de Arousa, por supostamente intentar manter relacións sexuais á forza coa súa filla no domicilio familiar. A rapaza conseguiu liberarse da agresión sexual golpeando o seu pai cun vaso de cristal na cabeza.
Os feitos aconteceron o 8 de abril de 2012 en Carril e este martes chegaron á Sección Segunda da Audiencia Provincial de Pontevedra. O xuízo celebrouse a porta pechada para manter a privacidade da presunta vítima, pero fontes xudiciais consultadas sinalaron que tanto a rapaza coma o presunto agresor reiteraron a versión do sucedido que mantiveron dende entón. O home asegurou non recordar con claridade o que pasou, pero que cre que non intentou manter relacións coa súa filla mentres que ela repite que si que o fixo.
Segundo o relato dos feitos que mantén a Fiscalía, todo aconteceu sobre as 21.00 horas cando o pai estaba na casa e a súa filla chegou da rúa. Ela, que no momento dos feitos tiña 29 anos, dirixiuse á ducha, saíu do baño envolvida nunha toalla e foi ao seu cuarto. Alí esperáballe o pai e, segundo relatou a rapaza, díxolle que quería manter relacións sexuais con ela, ao tempo que lle botaba na cara que o estaba a provocar.
A rapaza conseguiu liberarse da agresión sexual golpeando o seu pai cun vaso de cristal na cabeza
A continuación, supostamente o home tombouna enriba da cama e botouse enriba dela. A rapaza, que tiña un brazo escaiolado, intentou desfacerse del e, nun momento dado, logrou coller un vaso de cristal que estaba enriba da mesa de noite e o golpeou na cabeza. A raíz do golpe, el quedou atordado e foise ao salón, momento que aproveitou a rapaza para pechar a porta e atrancala por dentro cunha cadeira.
A contiuación, enviou mensaxes vía Whatsapp a dous amigos e á súa tía. A raíz desas comunicacións, a súa nai e a súa tía foron inmediatamente para a casa e encontrárona a ela moi nerviosa no seu dormitorio. Acompañárona á casa da súa avoa e pouco despois á Comisaría da Policía Nacional para presentar denuncia.
A Policía Nacional fora alertada do sucedido e foi á vivenda. Nese momento o suposto agresor estaba só e procederon á súa detención. O home presentaba claros síntomas de encontrarse baixo os efectos do alcohol e, durante o xuízo, tanto a suposta vítima coma outras testemuñas corroboraron que o home estaba ebrio.
Á hora de cualificar os feitos e pedir unha condena para o procesado, o fiscal tivo en conta a circunstancia eximente incompleta de embriaguez e o agravante de parentesco. Pídelle catro anos por agresión sexual en grao de tentativa. O xuízo quedou visto para sentenza.