Ábrese unha guerra de "fotos denuncia" entre o PP e o BNG de Poio
Por Redacción
O Partido Popular de Poio reaccionou ante as fotos difundidas dende o BNG na que aparecía mal aparcado o vehículo do voceiro do grupo municipal do PP, Ángel Moldes. Os populares cualifican a actitude do BNG de "mediocre, carroñeira e trapalleira".
Ángel Moldes afirma que sofre un acoso e un seguimento constante, ademais de asegurar que non é a primeira vez que intentan algo parecido. Segundo expón a foto realizouse hai case un mes cando falaba nas inmediacións cunha das persoas que vive na vivenda que se aprecia na fotografía.
O voceiro popular pregúntase "por que agora mostran as fotografías? queren volver realizar unha campaña porca como nas pasadas eleccións municipais ou pretenden intimidar o PP de Poio para que non faga público nin pregunte se realmente é certo que a Policía local sancionou varios usuarios por mirar cara ao radar?". E afirma que "o máis rastreiro é utilizar mesmo fotografías co turismo ben estacionado só coa única intención de danar o portavoz popular no persoal e no profesional". Moldes tamén pide desculpas porque os veciños teñan que sufrir uns dirixentes que se "dedican ao chivateo ou case a actitudes de programas de salsa rosa tipo 'Sálvame'".
E o voceiro popular tamén difunde varias fotos, unha na que se observa o coche que normalmente utiliza o autor das fotos do vehículo de Ángel Moldes estacionado nunha praza de discapacitados e tamén en cuadrícula amarela, ademais doutra na que, segundo denuncia, se observa un vehículo que utiliza un concelleiro do BNG estacionado nunha beirarrúa da parroquia de Raxó e pisando unha liña amarela continua que prohíbe o estacionamento.