13.000 euros de axuda á Asociación de Enfermos Psíquicos Alba
Por Redacción
O alcalde de Pontevedra, Miguel Anxo Fernández Lores e Carmen Blanco, a presidenta da Asociación de Enfermos Psíquicos 'Alba', asinaron este luns 12 un acordo polo que o Concello de Pontevedra colabora con este colectivo con 13.000 euros. O acordo, con periodicidade bianual, ten como obxectivo a integración das persoas que sofren enfermidades mentais a través de pisos de acollida.
Segundo expuxeron as representantes do colectivo contan con ao redor de oitenta integrantes que desenvolven diversas actividades en talleres de asesoramento. En Pontevedra dispoñen de catro pisos de acollida e doce persoas traballan nesta asociación coa intención de axudar a estes enfermos.
As dúas representantes da Asociación Alba indicaron que nos últimos anos se viu reducida a achega que recibían por parte da Consellería de Sanidade. O colectivo conta cun centro de rehabilitación psicosocial, atención domiciliaria, escola de familias e ofrece información e asesoramento aos familiares das persoas que sofren estas enfermidades.