O Bloque de Poio difunde unhas fotos do coche do voceiro do PP mal aparcado
Por Redacción
Co título de "Por que non lle gustan ao candidato do PP de Poio á Alcadía as sancións de tráfico?", o Bloque Nacionalista Galego de Poio difundiu entre os medios de comunicación dúas fotografías dun vehículo mal aparcado nunha rúa de Raxó, que segundo aseguran "asiduamente utiliza o candidato cando vai visitar unha cafetaría desa parroquia".
A comunicación remitida polos nacionalistas alude ás reiteradas críticas do voceiro do PP local, Ángel Moldes.
"Ás veces un se pregunta por que unha persoa, e ademais político, persegue tanto o traballo executado por uns traballadores municipais, neste caso as sancións de tráfico que a Policía Municipal de Poio impón soamente a aquelas persoas que infrinxen as normas de tráfico e por suposto sen ningún tipo de persecución, como pretende dar a entender as continuas notas do PP sobre o labor dos axentes municipais", di o escrito en referencia ao suposto "afán recadatorio do Concello" denunciado polos populares.
O Bloque pregúntase se Ángel Moldes non está de acordo coas normas establecidas, "porque si así fóra, se algunha vez saíse elixido alcalde podería deixar estacionados os coches ao seu libre albedrío", conclúen.