Adxudicadas en 438.000 euros as obras de reforma do campo de fútbol de As Estremas
Por Redacción
A empresa Mecano Sport S.L. será a encargada de realizar as obras de reforma do campo de fútbol municipal de Carballedo, coñecido como campo de As Estremas e situado no concello de Cotobade. Así o acordou a Xunta de Goberno da Deputación, que adxudicou os traballos en 438.503,99 euros.
Ao concurso presentáronse un total de 10 empresas, sendo a oferta gañadora a de Mecano Sport.
As obras incluirán a reforma integral das instalacións e a dotación de céspede artificial de última xeración. Realizarase para iso o movemento de terras necesario para preparar o terreo, que se compactará, dotarase dunha base de zahorra, regos de adherencia e pavimento asfáltico, sobre o que se colocará o céspede artificial.
Unha vez preparado o terreo de xogo (que terá unhas dimensións de 100 metros x 60), marcarase para un campo de fútbol 11 e dous de fútbol 7, dotarase de novas porterías, banderíns e marcadores.
Así mesmo, procederase a desmontar as varandas existentes e á colocación dun peche perimetral de aluminio; instalarase un novo sistema de iluminación dotado de 4 torres de 16 metros de altura e de 4 e 5 proxectores de 2.000 W; e dotarase o campo dunha rede de rego composta por 6 aspersores. En todo o contorno do terreo de xogo haberá un camiño pavimentado.
MELLORA MOI DEMANDADA
Trátase dunha obra moi demandada polos veciños do concello, dado que o campo de Carballedo é o único de titularidade municipal e é utilizado por uns 250 deportistas cada semana.
Nel xogan 100 nenos das Escolas Deportivas Municipais, xoga e adestra o equipo federado de Cotobade, adestra o Club de Fútbol Caroi e xogan tamén tres equipos de veteranos: o San Xurxo, o Tenorio e o Carballedo. ÿ, pois, unha infraestrutura moi utilizada que precisaba dunha remodelación para adaptalo a este uso intensivo, mellorar o seu estado e facilitar tamén os labores de conservación e mantemento.