Identifican unha parella por roubar 2.000 e 1.200 euros a dous anciáns simulando un tropezón no ascensor
Por Redacción
A Policía Nacional logrou identificar a unha parella que nos últimos meses sementou unha gran preocupación en diversas localidades pontevedresas e coruñesas por dedicarse a desvalixar persoas maiores ás que vixiaban ao entrar e saír do banco e conseguía furtar o diñeiro que retiraban das súas contas simulando que tropezaban con eles en lugares como o supermercado ou un ascensor.
As tarefas de investigación da Comisaría de Pontevedra permitiron a súa identificación e o home foi detido finalmente por axentes de Santiago de Compostela o 30 de abril. Atribúenselles furtos destas características na cidade do Lérez, Marín, A Coruña, Santiago de Compostela ou Vilagarcía de Arousa.
Os identificados son un home de 31 anos e unha muller de 29, ambos os dous con antecedentes policiais e naturais de Romanía, pero co domicilio establecido na Coruña. No caso de Pontevedra atribúenselle furtos por valor de 1.200 e 2.000 euros; en Marín, por valor de 480; e en Vilagarcía, de 500.
O primeiro delito que a Policía Nacional lle atribúe na cidade rexistrouse o 2 de xaneiro. Unha pontevedresa denunciou que lle faltaban 2.000 euros que acababa de retirar nunha sucursal bancaria da avenida de Vigo. Un parella entrou ao mesmo tempo que ela no portal e o ascensor do seu edificio e, nun momento dado, un deles tropezou a pesar do espazo existente no interior. A continuación, ambos os dous baixaron e ela decatouse de que lle faltaba o seu diñeiro. Saíu correndo á rúa, pero xa non puido darlles alcance.
A Policía Nacional pide os pontevedreses de idade avanzada que aumenten as precaucións cando sacan cartos do banco
A raíz destas dúas denuncias na Comisaría de Pontevedra iniciouse unha investigación que lles permitiu descubrir o modus operandi dos ladróns, que elixen como vítimas a persoas maiores, preferiblemente mulleres, e vixían os seus movementos cando retiran importantes cantidades de diñeiro no banco.
A Policía Nacional aproveita para pedir precaución os pontevedreses, en especial ás persoas maiores que acoden ao banco a retirar cantidades considerables de diñeiro en efectivo. Deberán poñer atención tanto antes de entrar na sucursal coma ao saír desta para intentar asegurarse de que ninguén os está a seguir para subtraerlles o diñeiro que acaban de retirar.
Aconsellan que é importante e fundamental gardar o diñeiro nun sitio seguro, como o interior da chaqueta ou un bolso pechado con cremalleira, e que nunca saian co sobre na man para evitar que alguén ao descoido llo arrebate e saia correndo. Ademais, recoméndase que sempre intenten ir acompañados dun familiar para realizar este tipo de xestións.