Presentan nun Congreso mundial un estudo conxunto do CHOP e a Facultade de Ciencias do Deporte
Por Redacción
Un estudo conxunto do Complexo Hospitalario Universitario de Pontevedra e a facultade pontevedresa de Ciencias do Deporte da Universidade de Vigo, sobre as vantaxes do exercicio aeróbico mantido no tempo e a súa influencia no bo estado intelectual das persoas maiores sen demencia, foi seleccionado como comunicación meritoria no 66º Congreso da Academia Americana de Neuroloxía, celebrado en Philadelphia (USA) entre os pasados días 25 de abril e 3 de maio. Este foro é o de maior relevancia mundial na especialidade e reúne anualmente a miles de neurólogos de todo o planeta.
Este estudo conxunto, que foi realizado polos profesores da facultade pontevedresa de Ciencias do Deporte da Universidade Vigo -doutores Jose Mª Cancela e Carlos Ayan- e o doutor Manuel Seijo-Martinez, xefe do servizo de Neuroloxía do Complexo Hospitalario Universitario de Pontevedra, elaborouse coa colaboración dun grupo de 39 persoas de ambos sexos, todos maiores dos 60 anos e de idades diversas ata os 83 anos, que non presentaban ningún tipo de demencia. Contou coa colaboración importante de Geriatros, grupo de residencias que acolle a moitos ancians.
Así, durante un período temporal de 15 meses, unha parte destas persoas realizaron exercicio continuado en bicicleta durante un mínimo diario de 15 minutos. Outra parte deste grupo incluido no estudo, por contra, non realizou exercicio físico algún.
DIFERENZAS SIGNIFICATIVAS
Os resultados revelaron diferenzas moi significativas entre ambos os dous colectivos. Así, aqueles individuos que realizaron o exercicio diario durante o período de 15 meses, non só se estabilizaron senón que melloraron os seus parámetros de capacidade intelectual, así coma a súa axilidade mental. En cambio, aquel grupo de persoas observadas neste estudo que non realizaron este exercicio diario durante o período de 15 meses foron empeorando progresivamente.
Segudo sinala o doutor Manuel Seijo-Martinez, xefe do servizo de Neuroloxía do CHOP, estes resultados indican que o exercicio físico aerobico diario pode ser unha medida para protexer ou atrasar demencias, entre as cales se encontra a enfermidade de Alzheimer. Non existe aínda ningunha vacina nin medicación que atrase e preveña a demencia.