O BNG quere recuperar espazos da Escola Naval e do Porto de Marín para uso público
Por Redacción
O BNG solicitou unha reunión co presidente da Autoridade Portuaria, Benito Suárez Costa, e co comandante-director da Escola Naval de Marín, Juan Luis Sobrino, para trasladarlles a demanda de espazos públicos destes dous recintos para a cidade coa intención de recuperar a fachada marítima e emprazar as instalacións náuticas e actividades sociais e culturais en espazos infrautilizados.
Dende o grupo municipal nacionalista reclaman que o Ministerio de Defensa e a Autoridade Portuaria faciliten a cesión destes espazos "en beneficio de todas as partes", segundo sinalou a voceira do BNG, Pilar Blanco.
Os nacionalistas presentaron alegacións ao Plan de Usos do Porto co obxectivo de establecer unha estratexia que permita desenvolver actividades e proxectos comúns vinculados a equipamentos culturais, recreativos, certames feirais, exposicións e a creación dun bulevardque recupere a fachada ao mar.
Reclámase o Ministerio de Defensa que poña a disposición dos cidadáns de Marín parte das zonas de terreo e de dotacións que, nalgúns casos, se encontran abandonadas ou inutilizadas. Dende o BNG indícase que "o uso civil destas instalacións tería un efecto social e económico sobre a cidade que non podemos ignorar".