O Valedor dá a razón ao Concello polo arranxo dos danos do temporal en propiedades privadas
Por Redacción
A adopción de medidas para garantir a seguridade de propiedades privadas corre a conta dos respectivos propietarios, e de acordo co artigo 199 da Lei 9/2002 de ordenación urbanística de Galicia, os concellos ordenarán, de oficio ou por instancia de calquera interesado, mediante o correspondente expediente e logo da audiencia dos interesados, a execución das obras necesarias para conservar as propiedades ou edificación en condicións de seguridade, hixiene e salubridade. Así o recorda o Valedor do Pobo no escrito remitido ao Concello de Sanxenxo con respecto aos danos ocasionados polos temporais que azoutaron Galicia este inverno en propiedades privadas anexas ao areal de Carabuxeira.
Deberían ser os donos das propiedades lindantes coa zona de praia as que deberían procurar a conservación e mantemento dos muros de peche das súas propiedades. Todo elo con independencia das reclamacións indemnizatorias que poderían presentar por considerar que os danos que se puideran producir nos muros de peche derivan das alteracións provocadas na praia da Carabuxeira por consecuencia das obras de ampliación do porto de Sanxenxo, continúa o escrito de José Julio Fernández Rodríguez.
Con iso, o Valedor dá a razón ao Executivo sanxenxino que defendeu dende un principio que non lle corresponde á Administración local sufragar o custo da reparación dos danos causados pola acción do mar durante os temporais nunha propiedade privada. Xa no seu día, o Goberno municipal insistiu en que os donos das vivendas son os responsables de preservar a súa seguridade, como é o caso dos lindantes da edificación afectada, que acometeron obras de reforzo das cimentacións e dos muros para evitar derrubas.
Aínda así, dende o Concello de Sanxenxo insistiron dende un primeiro momento en que "atenderemos ás reclamacións presentadas polos veciños por danos acreditados causados por unha actuación municipal".
En canto á recomendación realizada polo Valedor do Pobo referida ao arranxo do vial peonil de acceso á praia de Carabuxeira, no que se produciu un oco baixo a súa estrutura, dende o Executivo matizaron que se trata dunha obra de inminente execución e da que xa foron informados os reclamantes. De feito, segundo o concelleiro de Medio Ambiente, esta actuación estaría rematada se non fose porque as estadas colocadas nun edificio lindante impediron o acceso da maquinaria á zona.