CC.OO. amplía a súa maioría no comité de empresa de Elnosa
Por Redacción
Comisións Obreiras (CC.OO.) gañou as eleccións sindicais en Elnosa (Electroquímica do Noroeste) que se realizaron durante a xornada deste mércores 30 de abril e logrou aumentar a súa maioría no comité de empresa.
O plantel de 68 traballadores tiña que elixir, para os próximos catro anos, un comité de empresa de cinco membros, tres polo colexio de técnicos e administrativos; e dous polo colexio de especialistas e non cualificados. Nos dous colexios presentaron candidaturas CC.OO. e o sindicato UGT e saíron elixidos catro membros do comité de CC.OO. e un de UGT.
No anterior comité, presidido por Jaime Iglesias, CC.OO. tiña tres membros e UGT dous.
Elnosa enfróntase nestes próximos anos á resolución sobre o seu futuro na súa actual situación en Lourizán. CC.OO., tras esta vitoria, xa anunciou que solicitará unha reunión coa dirección do Grupo CUF, propietario da electroquímica, para buscar un compromiso sobre a continuidade do proxecto en Pontevedra.