Ence convoca un novo Programa de Bolsas para Estudos de Master dirixido a estudantes da comarca de Pontevedra
Por Redacción
ENCE convocou por terceiro ano consecutivo o seu Programa de Bolsas para Estudos de Máster dirixido a estudantes residentes na cidade de Pontevedra e na súa bisbarra.
Cada unha das catro bolsas que se ofertan para a realización de estudos no estranxeiro terá unha dotación de 6.000 euros. Como en anteriores edicións, o 50% do importe da bolsa recibirase antes do inicio dos estudos. Os estudantes que opten polas universidades galegas recibirán un apoio de 3.000 euros mentres que os que escollan outras universidades españolas recibirán, ademais deses 3.000 euros, un complemento de 1.000 euros para gastos de desprazamento.
Nesta edición, os criterios de resultados académicos e pertinencia dos estudos serán os únicos que se terán en conta e os alumnos que entren neste programa contarán con máis opcións á hora de realizar prácticas na empresa. Ence tamén priorizará aquelas solicitudes para o estudo de programas relacionados coa protección do medio e da biodiversidade, as ciencias forestais e agrarias, a enxeñaría, o desenvolvemento industrial, a administración e xestión de empresa e as ciencias sociais e da comunicación.
As bases deste programa poderán ser descargadas da web de Ence Pontevedra a partir do martes 29 de abril e solicitar máis información a través do correo: becasencepontevedra@ence.es.