Evacúan un edificio de Marín polo incendio dun vehículo no garaxe
Por Redacción
O incendio dun turismo no garaxe obrigou a desaloxar todas as vivendas do edificio número 139 da rúa Jaime Janer de Marín durante a madrugada deste sábado 26 de abril. O suceso producíase en torno ás 0:48 horas cando, por causas aínda por determinar, un vehículo se incendiaba afectando a outro turismo situado na mesma instalación.
Ata o lugar trasladáronse dotacións da Policía Local e Nacional. Os bombeiros do Morrazo e de Pontevedra lograron controlar as lapas pero foi necesario evacuar o edificio ante a presenza de fume. As primeiras en chegar, segundo sinalaron os bombeiros do Morrazo, foron as dotacións do Parque de Pontevedra que iniciaron a busca e localización do foco do incendio no garaxe. Rapidamente incorporáronse os bombeiros do Consorcio Provincial desprazados dende a base de Bueu.
Segundo os bombeiros de Pontevedra, a intervención para a extinción do lume levou máis de dúas horas porque o incendio provocou danos no garaxe, afectando a outros vehículos aparcados no recinto e provocando danos nas canalizacións de electricidade, saneamento e abastecemento de auga. Ademais provocou desprendementos de estruturas do teito do garaxe. Non se rexistraron feridos. Os servizos de emerxencia permaneceron na zona ata as 6:30 da mañá.