Forestais forma a futuros apagalumes
Por Redacción
A Escola de Enxeñaría Forestal do campus de Pontevedra márcase como obxectivo completar os coñecementos teóricos dos futuros enxeñeiros forestais coa aprendizaxe sobre o terreo de como se traballa cun camión motobomba ou cun helicóptero na loita contra o lume. Con ese fin, esta semana está a realizar un curso de técnicos de brigada helitransportada contra incendios forestais.
Segundo informa o Diario da Universidade de Vigo (DUVI) o curso corre a cargo do profesor de Forestais Daniel Vega e de David López, da empresa Forex, e trata de proporcionar formación ao estudantado a formación necesaria para contar con "profesionais cuns sólidos coñecementos teóricos e tamén cunha moi boa base práctica" que loiten contra a lacra dos incendios forestais.
A actividade formativa está aberta a toda a cidadanía, pero entre os 25 alumnos a maioría son estudiantes de Forestais. Entre eles, 15 son alumnos da materia Incendios forestais que imparte Daniel Vega e que se centra en "profundar nunha serie de aspectos teóricos sobre o comportamento dos lumes".
A formación relativa a como planificar a loita contra o lume complétase coa aprendizaxe sobre o terreo e o curso incluiu prácticas cun camión motobomba, para as que a escola contou coa colaboración do Centro de Investigacións Forestais de Lourizán. Este xoves desprazáronse á base do Servizo de Prevención e Defensa contra Incendios Forestais da Xunta no Campiño, onde o alumnado puido aprender como se desembarca, como se orienta un helicóptero para as descargas ou como se evacúa ao persoal nunha situación de emerxencia.
O obxectivo final desta iniciativa é dotar aos asistentes dos coñecementos teóricos e prácticos que lles permitan o día de mañá establecer sobre o terreo "as estratexias e tácticas máis apropiadas para combater cada lume". Neste senso, David López engade que o curso "pretende basicamente abrirlles as portas do mercado laboral", dotándoos de competencias para traballar como técnico de brigada helitransportada ou como técnico de operacións contra incendios.
Nos dous casos, as súas tarefas como profesionais estarían centradas en planificar e coordinar a loita contra o lume e dirixir tanto a actuación das brigadas como dos medios aéreos. Por iso, xunto co coñecemento práctico das ferramentas que se empregan para combater o lume, este curso fai énfase en diferentes aspectos relativos á planificación, como as condicións de seguridade e as rutas de escape que é preciso establecer ou as zonas do monte nas que é máis apropiado combater o lume.