Os montes pontevedreses sofren unha media anual de 49 incendios
Por Oskar Viéitez
Os montes pontevedreses sofren unha media anual de 49 incendios, segundo destaca o informe denominado "Plan do Monte" elaborado polo Concello de Pontevedra.
Dende que a vaga de lumes do ano 2006 asolou os montes de toda Galicia, a Mancomunidade de Montes de Pontevedra viu a necesidade de revisar o Proxecto de Ordenación dos Montes veciñais.
Esta iniciativa, promovida polo goberno local de Pontevedra, conta coa participación das comunidades de Castro-Lampán, Lérez, Lourizán, Marcón, Mourente, Ponte Sampaio, Salcedo, O Salgueiral, Santa María e San Andrés de Xeve, Tomeza e Verducido. Todas estas comunidades de montes veciñais en man común son donas de 3.576 hectáreas, un pouco máis das 6.346 hectáreas de monte que ten o municipio, o 55,2% do total.
O informe redactado pola empresa Montes y Medio Ambiente Consultores S.L. sinala que a media anual de incendios forestais é "bastante elevada" con 24 hectáreas de masa forestal queimada.
Esta media repítese de xeito constante dende hai dúas décadas con dúas excepcións: os anos 2006 e 1989.
As directrices que marca o Plan do Monte dentro dunha estratexia de protección e de rexeneración pasan por conter a superficie de eucalipto, promover a reforestación con frondosas ou instar aos propietarios privados a que limpen ás súas propiedades.