Moldes e Aragunde renovan as presidencias do PP local en Poio e Cambados
Por Oskar Viéitez
Ángel Moldes, único candidato en presentarse, preside dende este sábado o PP de Poio. O congreso local, celebrado na casa da Comunidade de Montes de San Xoan, consumou o relevo do Javier Domínguez, que estivo á fronte do PP local dende 2002 e foi o candidato nas tres últimas eleccións.
Moldes contou co respaldo de todos os edís populares no Concello, así como dos expresidentes da agrupación e do colectivo de Novas Xeracións, así como de decenas de afiliados.
Tampouco houbo sorpresas en Cambados. Tamén Luis Aragunde foi o único candidato en concorrer á presidencia do PP local. O congreso celebrouse na Sociedade Cultural e pechou a etapa de José Manuel Cores Tourís na presidencia dos populares cambadeses.
O presidente do PPdeG, Alberto Núñez Feijóo, acudiu aos dous congresos locais e aproveitou a ocasión para falar da cita electoral do próximo 25 de maio.
En senllos actos, Feijóo manifestou que "estas eleccións son tan importantes como calquera outra e por iso é tan importante que os cidadáns fagan un exame de conciencia cando vaian votar o domingo electoral".
Segundo dixo, "non respondo nin responderei nunca polas razóns que nos meteron na crise", senón que "respondo e responderei as decisións que tomamos para saír dela e para pasar de ouvir sen descanso 'rescate, rescate, rescate' a ouvir 'esperanza, esperanza, esperanza'".