Unha acusada de branquexar diñeiro dun secuestro xustifica o seu patrimonio no seu traballo como gogó e en regalos de voda
Por Oskar Viéitez
A Sección Cuarta de la Audiencia Provincial de Pontevedra deixou visto para sentenza o xuízo contra Vanesa P.M, de 34 anos, acusada de ter branquexado diñeiro procedente do secuestro exprés que sufriu o empresario de Meaño, José María Cacabelos, propietario da empresa Construcciones y Excavaciones Carabel S.L.
Por aquel entón, en marzo de 2006, a acusada era noiva dun dos tres mozos que foron condenados por aquel secuestro, Omar Bajo Rodríguez. A familia do secuestrado chegou a pagar un rescate de 100.000 euros.
Durante a vista oral, Vanesa asegurou que o diñeiro co que comprou un vehículo Nissan era froito do seu traballo como azafata, gogó, camareira e modelo de pasarela. "Trabajo los fines de semana desde que tenía 18 años", xustificou ante o tribunal, "ganaba unos mil y pico euros al mes".
A acusada recoñeceu que en marzo de 2006 se desprazou ata Zaragoza coa súa parella para formalizar a compra dun vehículo Nissan e aínda que ela achegou o diñeiro, a negociación xestionouna o seu noivo.
O propietario do coche e o seu fillo, que tramitou a compra, aseguraron que lles pagaron 29.000 euros polo turismo.
Pola contra, Vanesa asegura que só pagaron "algo más de 24.000 euros". Na súa conta de Caixanova tiña aforrados 9.723 euros e que o seu pai e o seu sogro lles entregaron, 6.000 euros en man e 7.000 mediante transferencia, respectivamente, como regalo de vodas. Pois, aínda que non chegaron a casar, "lo teníamos pensado y ellos quisieron colaborar". Os pais de ambos os dous ratificaron esta versión dos feitos.
O seu exnoivo dixo estar "muy preocupado por que implicasen a Vanesa cuando ella no tenía nada que ver"
Igualmente o seu ex noivo Omar Bajo Rodríguez exculpou de todos os feitos á súa ex noiva e dixo estar "muy preocupado por que implicasen a Vanesa cuando ella no tenía nada que ver. Es algo moral, claro que estoy preocupado".
Omar, que prestou testemuño por videoconferencia, dirixiuse á presidenta do tribunal para recordarlle que aceptou un acordo de conformidade co fiscal Marcelo Azcárraga polo que foi condenado a seis anos de prisión tras recoñecer ser un dos tres secuestradores do empresario e asegurou que o propio fiscal lle dixo entón que "sabía que Vanesa no tenía nada que ver".
Todas estas explicacións non convenceron á fiscal que entende que "no existe justificación plena" para todas esas entregas de diñeiro e a compra de vehículo que coincide nunha escasa marxe de días coas datas de pagamento da liberación do secuestrado.
A fiscal mantén que o coche procedía de parte do prezo do rescate coa intención de "encubrir el origen delictivo de ese dinero y que Omar pudiera utilizarlo sin dejar rastro" polo que elevou a definitiva a súa petición inicial de tres anos de prisión para a acusada como presunta autora dun delito de branqueo de diñeiro e unha multa de 60.000 euros.
Ademais, o Ministerio Público pediu que a acusada indemnice a vítima do secuestro, José María Cacabelos, cos 29.000 euros pagados co diñeiro con intereses de demora.