Os pontevedreses poden consultar o censo electoral nas oficinas de Michelena ou na web municipal
Por Oskar Viéitez
Os votantes pontevedreses poden consultar o censo electoral de cara aos comicios europeos do 25 de maio nas oficinas da rúa Michelena ou na web municipal, como informou o Concello da capital a través dun comunicado.
Dende o 7 ao 14 de abril, os electores que o desexen poderán comprobar a súa inclusión no censo electoral para as próximas eleccións ao Parlamento Europeo e, no seu caso, presentar as reclamacións aos posibles erros de inscrición.
O Censo Electoral estará exposto nas oficinas do Padrón de habitantes do concello, sitas en Michelena 30 baixo, en horario de 8:30 a 13:30 horas.
A consulta, logo de identificación do interesado, farase exclusivamente por medios informáticos de acordo co que se establece na Lei Orgánica do Réxime Electoral Xeral co fin de salvagardar a confidencialidade dos datos persoais dos cidadáns.
Este feito é de especial relevancia para os cidadáns que acadaron en datas recentes a maioria de idade polos posibles erros ou exclusións que se poidan producir.