A fuga de Esperanza Aguirre chega a Poio
Por Oskar Viéitez
Creada e actualizada
Creada e actualizada
A páxina web do Concello de Poio foi 'hackeada'. A sabotaxe foi descuberta a primeira hora da mañá deste luns polos primeiros visitantes que acudiron á páxina municipal.
Ao intentar acceder ao portal en internet do Concello de Poio o usuario era redireccionado á páxina "hablatumusica.com" cunha montaxe do póster da película Fast and Furious sobre a cara da expresidenta da Comunidade de Madrid. A partir das 12:30 horas restableceuse o funcionamento da páxina con normalidade.
O incidente protagonizado por Aguirre o pasado xoves tras aparcar nun carril bus da Gran Vía madrileña está pendente de que un xuíz de Instrución decida se abre dilixencias contra a presidenta do PP de Madrid, por un delito de desobediencia ou por unha falta contra a orde pública.
Curiosamente a web á que era redireccionada a páxina do Concello ten habilitado un apartado dedicado a Esperanza Aguirre con cancións para fuxirse "para que a próxima vez que fuxa da Policía a menos que o faga con boa música", din. Entre outros suxiren: La carretera, de Julio Iglesias, ou King of the road, de Bertín Osborne.
A broma pode saírlle moi cara ao autor xa que a pena por 'hackear' webs vai de seis meses a dous anos de cárcere. En decembro de 2011 entrou en vigor unha modificación do código penal que introduce como novos delitos informáticos: o acceso non autorizado a sistemas alleos (art. 197.3), con seis meses a dous anos de prisión.