Un veciño de Bueu enfróntase a 17 anos de prisión por violar a súa filla menor de idade
Por Oskar Viéitez
A Sección Segunda da Audiencia de Pontevedra sinalou para o próximo xoves día 10 o xuízo contra Francisco Javier P.F., por un delito continuado de abusos sexuais e un delito continuado de utilización de menores de idade para elaborar material pornográfico, polos que lle piden 17 anos de prisión.
O acusado, que ten antecedentes cancelados e non computables nesta causa, ten unha única filla nacida no ano 1993. Segundo consta no escrito de acusación da Fiscalía, no ano 2006, o acusado, a súa filla e a nai desta, trasladáronse dende Bueu (Pontevedra) á localidade de Alcora (Castellón).
"Cometía os abusos cando a nai estaba ausente do domicilio", segundo a Fiscalía
Mentres a familia residía nesa poboación, o acusado, "aproveitando a autoridade e influencia que como pai exercía" e segundo a Fiscalía "movido polo desexo de satisfacer a súa atracción sexual cara a ela", cando a nena tiña 13 anos comezou a sometela a actos de natureza sexual. Sempre cando a nai estaba ausente do domicilio.
No ano 2009, como non parecía integrarse ben en Alcora, a familia decidiu que a nena regresase a Bueu onde pasou a residir en compañía da súa avoa materna. O Ministerio Público sostén que a partir de entón o acusado aproveitaba os períodos de vacacións do Nadal e de verán "para continuar realizando coa súa filla os actos sexuais".
Cando non estaba cos seus pais, o acusado comunicábase coa nena por teléfono e por Internet, solicitándolle que lle enviase vídeos e fotos de carácter sexual.
Grazas á axuda dos seus docentes se decidiu a interpoñer denuncia contra o seu pai
Segundo a Fiscalía o acusado desenvolveu este comportamento ata o Nadal de 2011. Foi en maio de 2012, grazas á axuda dos seus docentes e tras empezar terapia psicolóxica que se decidiu a interpoñer denuncia contra o seu pai.
Entre outras secuelas que recolle o escrito de acusación destácase que a moza sofre "dificultade para socializarse, entorpecemento afectivo, condutas autodestrutivas e alteracións na motivación sexual".
O Ministerio Público pide por un delito continuado de abusos sexuais prevaléndose de relación de parentesco, a pena de 10 anos de prisión e prohibición de aproximarse a menos de 100 metros de calquera lugar onde se encontre a filla, así como manter contacto ou comunicación con ela, en ambos os dous casos por tempo de once anos.
Ademais por un delito continuado de utilización de menores de idade para elaborar material pornográfico a Fiscalía pide 7 anos de prisión e prohibición de aproximarse a menos de 100 metros e manter contacto por tempo de oito anos.
En concepto de responsabilidade civil solicítase unha indemnización de 50.000 euros.