A nova directiva do Consorcio turístico de Sanxenxo, preocupada pola oferta ilegal de pernoctacións
Por Redacción
A nova directiva do Consorcio de Empresas Turísticas de Sanxenxo trasladou ao delegado territorial da Xunta de Galicia en Pontevedra, José Manuel Cores Tourís, a súa preocupación pola oferta ilegal que existe na vila turística en relación ás pernoctacións.
Segundo Alejandro Touriño, o presidente destes empresarios, "houbo un gran boom inmobiliario neste municipio e agora hai quen quere aproveitar que ten un piso nesta localidade para ofrecer aloxamentos, apartamentos ou habitacións sen estar dado de alta como empresario do sector turístico, o que para nós supón, evidentemente, unha competencia desleal". Por este motivo, solicitou un maior control por parte da administración autonómica agora que se achegan as vacacións de Semana Santa.
Touriño tamén preguntou ao delegado pola situación na que se encontra a reforma da PO-308 ao seu paso pola zona da Lanzada. Corres Tourís indicou que se están a levar a cabo as expropiacións dos terreos "de cara a que cando se faga o repranteo da obra, os traballos poidan comezar canto antes". Na reunión se encontraba presente o xefe territorial de Medio, Territorio e Infraestruturas, José Luis Díez.
Os empresarios solicitaron tamén a mellora da sinalización vertical dos establecementos hoteleiros de Sanxenxo nas estradas autonómicas co obxectivo de que os visitantes "saiban chegar correctamente ata os nosos hoteis e, especialmente, que coñezan a oferta existente".
Outra das demandas centrouse na cobertura de internet. Os empresarios indican que nos núcleos urbanos o sinal é bo pero no resto do municipio precisa de mellora porque os turistas "se atopan cun servizo deficiente no que a conexión a internet se refire".