Urbanismo de Sanxenxo estará operativo a partires do mércores 9 no terceiro andar do Concello
Por Redacción
O departamento municipal de Urbanismo de Sanxenxo entrará en funcionamento a partir do mércores 9 de abril no edificio da Casa Consistorial, segundo manifestou a concelleira delegada de Urbanismo, María Deza. As oficinas do servizo permanecerán pechadas ao público durante o luns e o martes da segunda semana de abril para facilitar o traslado dende a actual sede situada na rúa Cesteiros.
A partir do mércores, a sede estará situada na terceira planta do edificio do Concello. O obxectivo con este cambio é optimizar os recursos dispoñibles, segundo o goberno local,"co conseguinte aforro que isto supón ademais da comodidade para os veciños ao integrar servizos nunha soa dependencia".
María Deza tamén explicou que o acordo adoptado polo Pleno da Corporación de aprobar a disolución da Xerencia de Urbanismo entrará en vigor, se non se producen cambios, o próximo día 30. "A decisión debe ser publicada no Boletín Oficial da Provincia e ten que estar exposta ao público durante 15 días hábiles", explicou a concelleira. A partir dese momento quedará extinguida a personalidade xurídica do organismo creado en 2004 durante o último mandato de Telmo Martín en Sanxenxo.
Segundo explicou a responsable do Urbanismo de Sanxenxo, a partir de agora "a función que viña cumprindo o consello pasará a desenvolvela a comisión de Urbanismo, para garantir deste xeito a transparencia" coa participación dos partidos políticos con representación municipal.