Sanxenxo inclúe na rexeneración da Carabuxeira as directrices do Ministerio
Por Redacción
O consello de administración de Nauta Sanxenxo acordou, durante a reunión mantida este martes, encargar a firma de enxeñaría que redactou o recentemente autorizado proxecto básico de rexeneración da praia de Carabuxeira a súa adaptación a un proxecto de execución que conteña as achegas realizadas polo Ministerio de Agricultura, Alimentación e Medio Ambiente.
O vicepresidente da sociedade pública, Salvador Durán, informou que co obxectivo de proceder "de forma inmediata á recuperación definitiva do areal" Nauta Sanxenxo instou o inicio dos trámites deste expediente e encargou tamén un estudo aos seus servizos económicos para determinar as posibles vías de financiamento desta obra.
O edil comentou así mesmo que a intención do Goberno local é que o novo documento inclúa tamén a transformación dun soar, que presenta actualmente unhas condicións de abandono e conta cun muro en pésimas condicións, no acceso principal á praia unha vez sexa recuperada. Os plans do Executivo pasan, pois, porque esta baixada dispoña de escaleiras, así como dunha rampla que asegure a accesibilidade ao areal a persoas con mobilidade reducida así como ás brigadas municipais.
Nos próximos días a Administración sanxenxina contactará cos propietarios desta vivenda co fin de alcanzar un acordo que lle permita obter os terreos necesarios para iso.