O Concello de Pontevedra recortou a súa débeda no 2013 ata deixala en 19,3 millóns
Por Oskar Viéitez
O Concello de Pontevedra recortou a súa débeda no 2013 ata deixala en 19,3 millóns, segundo os datos ofrecidos polo concelleiro de Facenda, Raimundo González (BNG) que deu conta no Pleno deste luns do Informe de Liquidación do pasado exercicio. Concretamente a débeda baixou 4 millóns de euros, o que supón un 29,49% dos ingresos ordinarios.
Segundo González Carballo esta situación permite ao Concello a posibilidade de acudir a un crédito ata unha marxe de 30 millóns de euros.
O responsable das contas municipais informou que a liquidación do presuposto do ano pasado reflicte un nivel de execución que se sitúa por enriba do 92%.
"O goberno local cumpriu coa estabilidade presupostaria pechando o exercicio con superávit"
González instou a oposición a recoñecer a boa situación financeira do concello fronte aos "malos augurios" vaticinados polos populares.
Con estes números o concelleiro de Facenda presumiu que o goberno local cumpriu coa estabilidade presupostaria pechando o exercicio con superávit, "cun aforro bruto positivo de máis de 15 millóns de euros" cumprindo co teito de gasto e baixando a débeda.
"Permítame poner todos esos datos en cuarentena", foi a resposta do voceiro en asuntos económicos do Partido Popular, César Abal, que dixo non entender onde se gastou o concello todo ese diñeiro.