O alcalde de Ponte Caldelas promete novos investimentos en Tourón
Por Redacción
A nova directiva da Comunidade de Montes de Tourón, encabezada polo presidente Jesús Rosón, mantivo unha reunión co alcalde de Ponte Caldelas, Perfecto Rodríguez, para obter información dos investimentos previstos na parroquia.
O rexedor anunciou a inminente posta en marcha dun operativo de limpeza e conservación do ámbito da zona de arte rupestre para que estea activa ante a nova tempada de visitas. Repararanse sendas e camiños que dan acceso aos petroglifos, ao terse visto afectados pola acción erosiva das chuvias deste inverno. Ademais realizaranse traballos de sega e limpeza de maleza nesa zona.
Rodriguéz indicou tamén o inicio das obras de reparación do Camiño de San Ramón a partir do mes de maio, cun presuposto de execución de 44.926 euros. Este camiño ofrece acceso a un merendeiro e á Área Arqueolóxica de Tourón e precisa dunha capa de aglomerado asfáltico.
Por outra parte, tamén se informou da mellora do firme do camiño de ' Os Francos', que se encontra incluída no Plan de Obras Urxentes da Deputación Provincial. A obra tamén considera, por parte dos operarios municipais, a mellora do pozo de 'Os Francos' co saneamento e reforzo do muro de contención, ademais da instalación dun valado de protección para vehículos e peóns.